दैलेख, १५ साउन। दैलेखको गुराँस गाउँपालिका–१ स्थित मैनेखोलामा बुधबार बिहान फोर्स गाडी दुर्घटना हुँदा चार जना घाइते भएका छन् भने दुई जना सकुशल रहेका छन्।

प्रहरीका अनुसार आज बिहान करिब ८:३० बजे अछामतर्फ जाँदै गरेको सुदूरपश्चिम प्रदेश ०१–००१–ख ३०७२ नम्बरको फोर्स गाडी अनियन्त्रित भई सडकबाट करिब ३०० मिटर तल खसेर दुर्घटनामा परेको हो। गाडीमा सवार कुल ६ जनामध्ये चार जना घाइते भएका छन् भने दुई जनालाई सामान्य चोट लागेको छ।

दुर्घटनामा घाइते हुनेहरूमा सुर्खेतको बराहताल गाउँपालिका–७ का २५ वर्षीय जितेन्द्र दर्लामी (टाउको र हातमा चोट), अछामको कमलबजार नगरपालिकाका २५ वर्षीय सुमन शाही (टाउको, हात र खुट्टामा चोट), गाडी चालक विकास शाही (टाउको, हात र खुट्टामा चोट) तथा सहचालक अशोक शाही (टाउको, हात र खुट्टामा चोट) रहेका छन्। प्रहरीका अनुसार उनीहरूको अवस्था मध्यम रहेको छ।

त्यस्तै, बराहताल गाउँपालिका–७ की २९ वर्षीया मनमाया दर्लामीको हात र खुट्टामा सामान्य चोट लागेको छ भने ६ वर्षीय किशन दर्लामी सकुशल रहेका छन्।

घाइतेहरूको घटनास्थलबाट उद्धार गरी थप उपचारका लागि सुर्खेतस्थित कर्णाली केयर अस्पताल पठाइएको प्रहरीले जनाएको छ।

दुर्घटनाको कारण खुल्न बाँकी रहेको र घटनाबारे थप अनुसन्धान भइरहेको जिल्ला प्रहरीले जनाएको छ।